Liturgy to Our Lady of Penafrancia(Bikolnon)

AN SANTA MISA SA SOLEMNIDAD NI
NUESTRA SEÑORA DE PEÑAFRANCIA


Antifona sa Pagpoon
An dakulang tanda nahiling sa langit: an sarong babae nagugubingan kan aldaw, asin an bulan nasa irarom kan saiyang mga bitis asin sa saiyang payo an korona nin kagduwang bitoon. ( Kapahayagan 12: 11 )


Pagpoon

Celebrante: SA NGARAN NIN AMA ASIN AKI PATIN NIN ESPIRITU SANTO.

Banwaan: Amen.

Mga Pataratara

Celebrante: AN PAGKAMOOT NIN DIOS AMA, AN BIYAYA NI JESUCRISTONG KAGURANGNAN TA, ASIN AN BALAOG NIN ESPIRITU SANTO MAPASAINDO GABOS.

Banwaan: Asin mapasaimo man.


o an masunod na formulario

Celebrante: MAPASAINDO AN KAGURANGNAN.
(MAPASAINDO AN KATONINONGAN.)

Banwaan: Asin mapasaimo man.


Rito Penitencial

Celebrante: MGA TUGANG, ROMDOMON ASIN PAGSOLSOLAN NIATO AN SATONG MGA KASALAN, TANGANING MAGKANIGO KITANG MAGDOLOT KAINING SANTA MISA.

Gabos: Nagkokompisal ako sa Dios na makakamhan, asin sa saindo, mga tugang, ta nagkasala ako nin makuri sa honahona, sa olay, sa gibo, asin sa kapabayaan: nagkasala ako, nagkasala ako: makuring gayo an kasalan ko. Kaya ako namimibi ki Santa Maria Virgen, sa gabos na angeles asin santos, patin saindo, mga tugang, na ako nindo ipamibi sa Kagurangnan tang Dios.

Celebrante: KAHERAKAN KITA NIN DIOS NA MAKAKAMHAN, PATAWARON AN SATONG MGA KASALAN, ASIN DARAHON KITA SA BUHAY NA DAING KASAGKORAN.

Banwaan: Amen.

Celebrante: KAGURANGNAN, KAHERAKI KAMI.

Banwaan: Kagurangnan, kaheraki kami.

Celebrante: CRISTO, KAHERAKI KAMI.

Banwaan: Cristo, kaheraki kami.

Celebrante: KAGURANGNAN, KAHERAKI KAMI.

Banwaan: Kagurangnan, kaheraki kami.


Pag-omawon an Dios

Pag-omawon an Dios sa kaitaasan asin sa daga katoninongan sa mga tawong marhay an boot. Inoomaw mi ika. Binabantog mi ika. Sinasamba mi ika. Rinorokyaw mi ika. Pinasasalamatan mi ika huli kan saimong dakulang kamurawayan. Dios na Kagurangnan, Hadeng langitnon, Dios Amang makakamhan, Kagurangnan Aking bugtong, Jesucristo. Kagurangnan na Dios, Cordero nin Dios, Aki nin Ama. Ika na nagpapara kan mga kasalan nin kinaban, kaheraki kami. Ika na nagpapara kan mga kasalan nin kinaban, akoa an samong pakimaherak. Ika na nagtutukaw sa too nin Ama, kaheraki kami. Ta ika sana an banal, ika sana an Kagurangnan, ika sana an orog kahalangkaw, O Jesucristo, kaiba an Espiritu Santo, sa kamurawayan nin Dios Ama. Amen.



Pamibi sa Pagpoon


Celebrante: MAMIBI KITA…

DIOS NA MAHEHERAKON,
KAMI NAG-OOMAW SA INA NIN DIOS,
NUESTRA SRA. DE PEÑAFRANCIA.
HULI SA SAIYANG MGA PAMIBI,
MALABANAN MAN LUGOD
AN SAMONG MGA KASALAN
ASIN PAGKUKULANG.
INI HINAHAGAD MI HULI KI CRISTO
NA SAMONG KAGURANGNAN.

Banwaan: Amen.






LITURGIA KAN TATARAMON

Enot na Babasahon Genesis 3: 9 – 15

Sa enot na babasahon ipinahayag na sarong babae an magigin kaiwal kan nagdara sa satuyang enot na mga magurang sa pagkakasala. Si Virgen Maria na pano nin kabanalan padagos na inootob an saiyang katongdan na irayo an mga tawo sa karatan. Siya an paladan, an babae na nagin Ina kan nagdaog kan kapangyarihan nin karatan.

Pagbasa sa Libro nin Genesis

Pakakakan ni Adan kan bunga kan kahoy, inapod siya nin Dios asin sinabihan siya: Haen ka? Siya suminimbag: “ Nadangog ko an Saimong tingog sa paraiso asin natakot ako huli ta huba ako, kaya ako tuminago”. Sinabihan siya: “ Si’say an nagsabi saimo na ika huba, kun dai ka nagkakan kan bunga kan kahoy na ipinagboot Ko saimong dai kakanon?” Suminabi si Adan: “ An babaeng itinao Mo sakuya bilang kaibahan, tinawan ako kan bunga kan kahoy na sakuyang kinakan”. Sinabihan nin Dios na Kagurangnan an babae: “ Tano ta ginibo mo iyan?” Siya suminimbag : “ An halas dinaya ako asin ako kuminakan”. Asin nagtaram an Dios sa halas: “ Huli ta ginibo mo iyan, ika magigin daing palad sa gabos na mga hayop, asin mababangis na kahayopan sa daga. Maglalakaw kang nagkakanap sa saimong daghan asin ika magkakakan kan daga sa gabos na aldaw nin saimong pagkabuhay. Papag-iwalon ko ika asin an babae, an saimong banhi asi an saiyang banhi. Roronoton niya an saimong payo asin hihipaan mo an saiyang bitis.

An Tataramon nin Kagurangnan.


Salmo Responsorio

Simbag: O Maria nin Peñafrancia, kami pamibian sa Kagurangnan

1. Umawit kamo sa Kagurangnan nin bagong awit, huli ta Siya guminibo nin mga ngangalasan. Ilinigtas Niya kita kan Saiyang toong kamot asin kan Saiyang takyag na banal.
2. Ipinamidbid nin Kagurangnan an saiyang kaligtasan, sa atubang nin mga banwaan ipinahayag an Saiyang katanosan. An harong ni Israel Saiyang naromdoman Huli kan Saiyang pagkamaheherakon asin katotoohan.

3. Nahiling kan gabos an kadakulaan kan satong Dios. Mag-omaw kamo sa Dios sa kinaban magrokyaw asin mag-omaw.


Ikaduwang Babasahon Apocalipsis 11: 19; 12: 1 –6

Ipinangaki ni Virgen maria si Jesus, an ipinadarang Paratubos. Nagin tawo si Jesus tanganing iligtas kita sa karatan. Sa ikaduwang babasahon ipinapahayag na may dragon na boot na holonon an aki. An dragon iyo an karatan, dai manggagana an karatan sa kapangyarihan kan ipinangaki ni Maria, si Jesus na dara an kapangyarihan nin kaligtasan.


Pagbasa sa Libro nin Apocalipsis

Nabuksan an santuario nin Dios sa langit, asin nahiling an kinaban nin Tipan sa santuario, asin nagka-igwa nin mga kikilat, rinagobrob nin dagoldol, linog asin makosog na oran nin yelo. Sarong dakulang tanda nagpahiling sa lanit: Sarong babae na na gubing aldaw, an bulan nasa irarom nin saiyang mga bitis asin korona nin kagduwang bitoon sa saiyang payo. Siya bados asin nagkukurahaw sa kolog nin pangaki. Saro pang tanda nagpahiling sa langit: Sarong dragon na dakula asin mapula, may pitong payo asin sampolong sungay, aisn pitong korona sa saiyang payo. Ginoyod kan saiyang ikog an ikatolong kabtang kan mga bitoon sa langit asin ihinulog sa daga. An dragon nagtonong sa atubang kan babae na madali nang mag-aki tanganing halonon an aki, tolos pakaluwas sa tulak nin saiyang ina, lalaki an aki kan babae” Siya an maghahade sa gabos na banwaan asin batbat an saiyang cetro, asin an aki dinara sa Dios asin sa saiyang trono mantang an babae duminulag sa lantad. Duman igwa siya nin eerokan na inandam Dios, duman siya aatamanon sa laog nin sangribong duwang gatos may anom na polong aldaw.

An Tataramon nin Kagurangnan.
Pagrokyaw

Alleluia. Tara, Maria pano ka nin gracia an Kagurangnan yaon saimo paladan ka sa gabos na mga babae. Alleluia.


Evangelio Lucas 2: 27 – 35

Pagbasa kan Evangelio na Sinurat ni San Lukas

Sa pasabong kan Espiritu Santo, naglaog si Simeon sa templo. Kan an umboy na si Jesus darahon kan saiyang mga magurang sa pag-otob kan hinahagad kan katogonan, kinua Siya ni Simeon asin itinaas, dangan nagpasalamat sa Dios na na sabi: “ Kagurangnan, tugote nang magadan sa katoninongan an Saimong sorogoon sosog sa Saimong panuga, huli ta nahiling ko na an Saimong kaligtasan, na inandam Mo para sa gabos na tawo sarong ilaw na magliliwanag sa mga pagano, asin magtatao nin kamurawayan sa Israel na Saimong banwaan. Nag-ngalas si Jose asin si maria sa sinabi ni Simeon dapit sa aki. Benendisyonan sinda ni Simeon, asin sinabihan si Maria na saiayang ina, “ uya, an aking itinalaga para sa pagkapadungkal asin pagbangon nin dakul sa Israel; saro siyang tanda hale sa Dios na isisikwal nin dakul na tawo, kaya mahahayag an saindang iniisip. Dangan an kamondoan, siring sa sarong matarom na espada, malagbas sa saimong puso.”

An Marahay na Bareta nin satong Kagurangnan.



Homilia


Minatubod


Pamibi ni Banwaan

Celebrante: SI MARIA SANTISSIMA IYO AN INA NIN DIOS, HULI TA SIYA AN INA NI CRISTO. SIYA MAN AN INA NIATO GABOS, HULI TA KITA MGA TUGANG NI CRISTO. HAGADON TA AN SAIYANG PAGSUROG ASIN PAG-AMPON ASIN MAGDANAY LOGOD SA SATUYA AN PAGKABORONYOG SA PAAGI KAN SAIYANG PAGKAMOOT. SA LAMBANG PAG-ARANG INI AN SATONG SABIHON:

Simbag: KAGURANGNAN, BENDICIONI KAMI HULI KI VIRGEN MARIA.

1. Huli sa pamibi ni Virgen Maria Santissima, Ina nin bilog na Simbahan, mahidali lugod an pagkasararo nin gabos na Cristiano. Mamibi kita sa Kagurangnan.

2. Huli sa pamibi ni Maria Santissima, paalawan nin mga parakasala, itao sato an biyaya nin dalisay na pagsolsol tanganing magin maninigo kita sa paghimate kan pagkasararo kan Santisima Trinidad. Mamibi kita sa Kagurangnan.

3. Huli sa pamibi ni Maria Santissima, an mga magurang sa mga familia makaotob kan saindang katongdan sa saindang mga aki. Mamibi kita sa Kagurangnan.

4. Para sa gabos na daraga asin soltero sa mga familia, si Virgen Maria magin panalmingan nin kabinian, kapakumbabaan asin kabanalan. Mamibi kita sa Kagurangnan.

5. Huli sa pamibi ni Maria Santissima, parasurog nin mga Cristiano, logod an lambang miembro kan Simbahan mailigtas sa poder nin kadikloman asin mabuhay sa liwanag nin gracia nin Mahal na Dios. Logod an gabos na mga familia madara sa liwanag na ini. Mamibi kita sa Kagurangnan.

Celebrante: WARASAN SA SAIMONG MGA SOROGOON, O DIOS NA KAGURANGNAN, AN DANAY NA KARAHAYAN SA KALAG ASIN SA HAWAK. SA PAG-AMPON NI VIRGEN MARIA, INA NIN PAGKABORONYOG KI JESUS, MAKALIKAY LOGOD KAMI SA MGA KASAKITAN SA BUHAY. INI HINAHAGAD NIAMO HULI KI CRISTO NA SAMONG KAGURANGNAN.

Banwaan: Amen.


Pagdolot

Celebrante: PAG - OMAWON KA KAGURANGNAN; DIOS NIN GABOS NA LINALANG: HULI KAN SAIMONG PAGKAHERAK NAKAMTAM MI INING TINAPAY, BUNGA KAN DAGA ASIN NIN SAMUYANG KAPAGALAN. IDINODOLOT NIAMO INI SAIMO TANGANING PARA SAMUYA MAGIN TINAPAY NIN BUHAY.

Banwaan: Pag-omawon an Dios sagkod pa man.

Celebrante: PAG-OMAWON KA, KAGURANGNAN, DIOS NIN GABOS NA LINALANG; HULI KAN SAIMONG PAGKAHERAK NAKAMTAN MI INING ARAK, BUNGA KAN DAGA ASIN NIN SAMUYANG KAPAGALAN. IDINODOLOT NIAMO INI SAIMO TANGANING PARA SAMUYA MAGIN INOMON SA KALAG.

Banwaan: Pag-omawon an Dios sagkod pa man.

Celebrante: MAMIBI KAMO MGA TUGANG, TANGANING AN SAKO ASIN AN SAINDONG ATANG MAGKANIGONG AKOON NIN DIOS AMANG MAKAKAMHAN.

Banwaan: Akoon logod nin Kagurangnan an atang sa saimong mga kamot sa kaomawan nin Saiyang ngaran, sa pakinabang niato asin nin bilog na simbahan.


Pamibi sa Pagdolot

Celebrante: MAMIBI KITA….

KAGURANGNAN NIAMONG DIOS,
HULI KAINING SACRIFICIO NA SAMONG
INAATANG NGONIAN, MAGIN MAN LUGOD KAMI NA MGA MANINIGONG DOLOT PARA SAIMO SAGKOD PA MAN
HULI KI CRISTO NA SAMONG KAGURANGNAN.

Banwaan: Amen


Mga Prefacio

Celebrante: MAPASAINDO AN KAGURANGNAN.

Banwaan: Asin mapasaimo man.

Celebrante: ITAAS AN MGA PUSO.

Banwaan: Initaas mi na sa Kagurangnan.

Celebrante: MAGPASALAMAT KITA SA DIOS NA SATONG KAGURANGNAN.

Banwaan: Maninigo asin matanos.


VIRGEN MARIA I

Celebrante: TOTOONG MANINIGO ASIN MATANOS,
NA DANAY ASIN MINSAN SAEN,
MAGPASALAMAT KAMI SAIMO, AMA,
DIOS NA MAKAKAMHAN ASIN DAING KATAPOSAN, MANTANG SAMONG GINIGIROMDOM AN KAOMAWAN NI NUESTRA SRA. DE PEÑAFRANCIA
NA SAMUYANG INA ASIN PATRONA.

IPINANGIDAM NIYA AN SAIMONG BOGTONG NA AKI SA KAPANGYARIHAN NIN ESPIRITU SANTO:
DAI NAWARA AN SAIYANG PAGKA-VIRGEN, IPINANGAKI NIYA PARA SA KINABAN AN ILAW NA DAING KATAPUSAN: SI CRISTO,
NA SAMONG KAGURANGNAN.

KAYA, SA KAIBAHAN KAN MGA ANGELES ASIN NIN GABOS NA SANTOS SA KALANGITAN, DAING ONTOK NA MINA-AWIT KAMI SA SAIMONG KAMURAWAYAN:

Banwaan: Banal, Banal, Banal na Kagurangnan. Dios nin mga hukbo; an langit asin daga pano kan saimong kamurawayan, Hosana sa kaitaasan! Pag-omawon an nadigdi sa ngaran nin Kagurangnan, Hosanna sa kaitaasan!


VIRGEN MARIA II

Celebrante: MAPASAINDO AN KAGURANGNAN.

Banwaan: Asin mapasaimo man.

Celebrante: ITAAS AN MGA PUSO.

Banwaan: Initaas mi na sa Kagurangnan.

Celebrante: MAGPASALAMAT KITA SA DIOS NA SATONG KAGURANGNAN.

Banwaan: Maninigo asin matanos.

Celebrante: TOTOONG MANINIGO ASIN MATANOS,
NA DANAY ASIN MINSAN SAEN,
MAGPASALAMAT KAMI SAIMO, AMA,
DIOS NA MAKAKAMHAN ASIN DAING KATAPOSAN. SA SAMUYANG PAGCELEBRAR KAN KAOMAWAN NI SANTA MARIA VIRGEN,
DAKULANG KAOGMAHAN PARA SAMO
NA AWITON AN SAIYANG AWIT NIN PASASALAMAT.

MGA NGANGALASAN SAIMONG GINIBO
SA BILOG NA KINABAN.
AN KADAKULAAN KAN SAIMONG PAGKAMOOT IHINIRAS MO SA GABOS NA KAPAG-ARAKIAN.

KAN PINAPAGKANIGO MO SI MARIA
AN SAIMONG MAPAKUMBABANG SOROGOON, INITAAS MO SIYA SA DIGNIDAD NA MAGIN INA NI JESUCRISTO, SAIMONG AKI, SAMONG KAGURANGNAN, PARATUBOS NIN GABOS NA KATAWOHAN.

NAKIKISUMARO KAMI SA MGA ANGELES SA KALANGITAN
SA PAG-AWIT KAN SAIMONG KAOMAWAN:

Banwaan: Banal, Banal, Banal na Kagurangnan. Dios nin mga hukbo; An langit asin daga pano kan saimong kamurawayan, Hosana sa kaitaasan! Pag-omawon an nadigdi sa ngaran nin Kagurangnan, Hosanna sa kaitaasan!


CANON

Celebrante: KAGURANGNAN, IKA NANGGAD BANAL BURABOD NIN GABOS NA KABANALAN. INING ATANG PAKABANALAON LOGOD KAN SAIMONG ESPIRITU. TANGANING PARA SAMO MAGIN + HAWAK ASIN DUGO NI JESUCRISTO, SAMONG KAGURANGNAN.

BAGO SIYA DARAHON SA KAGADANAN NA SAIYANG INAKO SA ROGARING NA BOOT, NAGKOA SIYA NIN TINAPAY ASIN NAGPASALAMAT; BINAAK DANGAAN ITINAO SA SAIYANG MGA DISIPULOS ASIN NAGSABI:

AKOA INI ASIN KAKANA NINDO GABOS:
INI IYO AN SAKUYANG HAWAK NA IDODOLOT PARA SAINDO.

SIRING MAN PAKAPAMANGGI, KINOA NIYA NA CALIZ. NAGPASALAMAT GIRARAY, ITINAO SA SAIYANG MGA DISIPULOS ASIN NAGSABI:

AKOA INI ASIN INOMA NINDO GABOS: INI IYO AN CALIZ NIN SAKUYANG DUGO: DUGO NIN BAGO ASIN DANAY NA TIPAN: DUGO NA PAPABOLOSON PARA SAINDO ASIN PARA SA GABOS TANGANING IPATAWAD AN MGA KASALAN. GIBOHA NINDO INI SA PAGROMDOM SA SAKO.


Celebrante/
Diacono: IPAGROKYAW NIATO AN MISTERIO NA SATUYANG TINUTUBOD.

Banwaan: Si Cristo nagadan!
Si Cristo nabuhay liwat!
Si Cristo mabalik giraray!

Celebrante: SA PAGROMDOM KAN SAIYANG PAGKAGADAN ASIN PAGKABUHAY LIWAT, IDINODOLOT NIAMO SAIMO, AMA, INING TINAPAY NIN BUHAY INING CALIZ NIN KALIGTASAN, NAGPAPASALAMAT KAMI TA PINAPAGKANIGO MO NA MAKIATUBANG ASIN MAKAPAGLINGKOD SAIMO.
KAMI NA NAGPAPAKINABANG KAN HAWAK ASIN DUGO NI CRISTO, NAKIKIMAHERAK NA MAGKASARARO LOGOD HULI SA ESPIRITU SANTO. AMA, GIROMDOMA AN SAIMONG SIMBAHAN SA BILOG NA KINABAN: PAPAGDANAYA SA MALUDOK NA PAGKAMOOT KAIBA AN SAMONG SANTO PAPA SI BENEDICTO AN SAMONG MGA OBISPO SI LEONARDO ASIN JOSE ASIN AN GABOS NA MGA PADI.

GIROMDOMA SIRING MAN AN SAMONG MGA TUGANG NA NAGADAN SA PAGLAOM NA SINDA MABUBUHAY LIWAT. SINDA ASIN AN GABOS NA MGA GADAN DARAHA SA LIWANAG NIN SAIMONG KAMURAWAYAN.

KAHERAKI KAMI GABOS: PAPAGKANIGOA NA MAKAMTAN MI AN BUHAY NA DAING KASAGKORAN SA KAIBAHAN NI MARIA VIRGEN NA INA NIN DIOS; SA KAIBAHAN NIN MGA APOSTOLES ASIN NIN GABOS NA SANTOS NA NAG-OTOB KAN SAIMONG PAGBOOT SA GABOS NA PANAHON. PAG-OMAWON ASIN IPAGROKYAW KA NIAMO: HULI KI JESUCRISTO NA SAIMONG AKI.

Celebrante: HULI SAIYA, SA SAIYA, SA KAIBAHAN NIYA ASIN NIN ESPIRITU SANTO, YAON SAIMO, DIOS AMANG MAKAKAMHAN, AN GABOS NA KAOMAWAN ASIN KAMURAWAYAN SA PANAHON NA DAING KASAGKORAN.

Banwaan: Amen.


Pag-Comunion

Celebrante: MAMIBI KITA SA MGA TATARAMON NA ITINOKDO ASIN ITINUGON SATO KAN SATONG KAGURANGNAN.

Banwaan: Ama niamo na yaon ka sa langit, sambahon an ngaran Mo: mapasamuya an kahadean mo: Koyogon an boot mo, digdi sa daga nin siring sa langit. An samong kakakon sa aroaldaw itao mo samuya ngonian; patawaron mo kami kan samong mga kasalan, siring kan pagpatawad niamo sa mga nagkasala samuya; hare kami pabayae na madaog nin sogot. Alagad agawon Mo kami sa maraot.

Celebrante: AGAWON MO KAMI SA GABOS NA MARAOT, NAKIKIMAHERAK KAMI SAIMO, KAGURANGNAN, WARASAN SA PANAHON NIAMO AN KATONINONGAN, TANGANING SA TABANG NIN SAIMONG PAGKAHERAK, MAKALIKAY KAMI SA KASALAN, ASIN SA ANO MAN NA KARATAN, MANTANG KAMI NAGHAHALAT KAN PAGDATONG NI JESUCRISTO, SAMONG PARATUBOS.

Banwaan: Huli ta Saimo an kahadean, saimo an kapangyarihan asin kamurawayan sa panahon na daing kasagkoran.

Celebrante: JESUCRISTONG KAGURANGNAN, SINABI MO SA MGA APOSTOLES: AN SAKONG KATONINONGAN ITINATAO KO SAINDO: HARE, PAGHILINGA AN SAMONG MGA KASALAN, KUNDI SA PAGTUBOD NIN SAIMONG SIMBAHAN: WARASAN SAIYA AN KATONINONGAN ASIN PAGKASARARO SOSOG SA SAIMONG KABOTAN. IKA NA NABUBUHAY ASIN NAGHAHADE SA PANAHON NA DAING KASAGKORAN.

Banwaan: Amen.

Celebrante: AN KATONINONGAN NIN KAGURANGNAN, MAPASAINDO SAGKOD PA MAN.

Banwaan: Asin mapasaimo man.

Celebrante/
Diacono: MAGPATINAOHAN KAMO KAN TANDA NIN KATONINONGAN.

Banwaan: Cordero nin Dios, na nagpapara kan mga kasalan nin Kinaban: Kaheraki kami.
Cordero nin Dios, na nagpapara kan mga kasalan nin Kinaban: Kaheraki kami.
Cordero nin Dios, na nagpapara kan mga kasalan nin Kinaban: Tawi kami nin katoninongan.

Celebrante: UYA AN CORDERO NIN DIOS! UYA AN NAGPAPARA KAN MGA KASALAN NIN KINABAN! PALADAN AN MGA INAAPOD SA PAGPAKINABANG KAINING CORDERO.
Banwaan: Kagurangnan, alang-alang ako na lumaog Ka sa sakong daghan: Alagad magtaram ka lamang, an sakong kalag maoomayan.

Celebrante: HAWAK NIN CRISTO!

Banwaan: Amen.

Antifona sa Comunion

Huli ta nahiling niya an kapakumbabaan nin saiyang oripon, poon ngonian aapodon akong paladan kan gabos na kapag-arakian (Lc 1:48)


Pamibi Paka-Comunion

Celebrante: MAMIBI KITA…

KAGURANGNAN NA DIOS,
TINAWAN MO KAMI
KAINING MGA SACRAMENTO
NIN DAING SAGKOD NA KALIGTASAN.
NAKIKIMAHERAK KAMI SAIMO,
NA HULI KAN PAGGALANG ASIN PAGOMAW NIAMO KI VIRGEN MARIA,
INA NIN SAIMONG AKI,
MAKAMTAN MI AN KAPANOAN
NIN SAIMONG BIYAYA ASIN MAMATEAN MI AN DANAY MONG PAGSUROG.
INI HINAHAGAD MI HULI KI CRISTO
NA SAMONG KAGURANGNAN.

Banwaan: Amen.


Pamibi ki Nuestra Señora de Peñafrancia

Lilingya man sa sako, O maheherakon na lna, Virgen de Peñafrancia, an saimong mahamis na mga mata asin kaheraki man ako na minadolok saimo, pano nin pagsolsol. Ampona an sakong familia, an sakong mga pinsan, katood asin parasorog. Tabangi an saimong mga devotos, si buhay pa asin mga gadan na orog na idtong maninigo kong tabangan. Sa oras nin sakong mga pag-alaman, kakundian asin pagtios, orog na sa sakuyang pagkagadan, antabayi man ako sa atubang nin Saimong Mahal na Aki. Tanganing matindogan asin matabangan mo ako, sabihi na ako devoto mo na dara nin dakulang pagsarig sa saimong pag-ampon minaluhod sa saimong pamitisan sa paghagad kan saimong mahalagang pagtabang. Nuestra Señora de Peñafrancia, pamibian, tabangi, rangaha asin ligtasan man ako. Amen.


Salve Regina

Salve regina, mater misericordiae; vita dulcedo et spes nostra salve; ad te clamamus, exsules filii evae. Ad te susperamus, gementes et flentes, in hac larimarum valle, eia ergo, advocata nostra, illos tuos misericordes oculos ad nos converte. Et jesum, benedictum fructum ventris tui, nobis post hoc exsilium ostende. O clemens, o pia, o dulcis Virgo Maria.

V. ORA PRO NOBIS SANCTA DEI GENETRIX

R. Ut digni efficiamur promissionibus Christi.

OREMUS:

OMNIPOTENS SEMPITERNE DEUS, QUI GLORIOSAE VIRGINIS MATRIS MARIAE CORPUS ET ANIMAN, UT DIGNUM FILII TUI HABITACULUM EFFICI MERERETUR, SPIRITU SANCTO COOPERANTE PRAEPARASTI; DA UT CUJUS COMMEMORATIONE LAETAMUR, EJUS PIA INTERCESSIONE, AB INSTANTIBUS MALIS ET A MORTE PERPETUA LIBEREMUR; PER CHRISTUM DOMINUM NOSTRUM. AMEN.


SOLEMNENG PAGBENDICION

Celebrante: MAPASAINDO AN KAGURANGNAN

Banwaan : Asin mapasaimo man

Celebrante/
Diacono : IDUKO AN PAYO SA PAGHAGAD NIN BENDISYON SA MAHAL NA DIOS

Celebrante: AN NAMUNDAG KI VIRGEN MARIA, AN AKI NIN DIOS, NAGTUBOS SA KATAWOHAN PAPAGYAMANON NIYA KAMO KAN SAIYANG MGA BALAOG.

Banwaan: Amen.

Celebrante: INAKO NINDO AN KAGTAO NIN BUHAY HULI KI MARIA, MAGDANAY KAMONG MAOGMA SA SAIYANG MAMOMOTON NA PANGATAMAN.

Banwaan: Amen.

Celebrante: NAPADIGDI KAMO SA PAG-OGMA SA KAFIESTAHAN NI MARIA. MAPANO KAMO KAN KAOGMAHAN KAN ESPIRITU ASIN KAN MGA BALOG SA SAINDONG EEROKAN NA DAING SAGKOD.

Banwaan: Amen.

Celebrante: BENDICIONAN KAMO NIN DIOS NA MAKAKAMHAN: AMA, ASIN AKI, + PATIN ESPIRITU SANTO.

Celebrante/
Diacono: TAPOS NA AN MISA LAKAW KAMO SA PAGKAMOOT SA DIOS ASIN SA KAPWA.

Banwaan: Salamat sa Dios.


Text from http://www.penafrancia.net
The Basilica of Our Lady of Penafrancia, Basilica Minore, Balatas Road, Naga City Philippines 4400 Tel: (6354)473-3644 Fax: (6354)473-6914